हो, यो भनाइ सत्य हो, मनको शान्ति खोज्न टाढा जानु पर्दैन, शान्ति मानिसभित्रै हुन्छ । मानिस शान्तिको खोजीमा दिनरात घोत्लिन्छ, भोक्रिन्छ, भौँतारिन्छ र कहीँ नपाएर थचारिन्छ । यो परिस्थिति मानिस आफैँले सिर्जना गरेको हो । वास्तवमा मनको शान्ति मानिसभित्रै हुन्छ, यसलाई प्राप्त गर्न सक्नुपर्छ । कुनै पनि कुरा प्राप्त गर्ने साधन, माध्यम र तरिका हुन्छन् । मनको शान्ति प्राप्त गर्ने विविध तरिका मध्ये योग पनि एक हो । मानिसको मन शान्त अवस्थामा रहनु पर्छ। अशान्त मनले अनेक मानसिक रोग निम्त्याउँछ । मनलाई चञ्चल हुन नदिई स्थिर अवस्थामा राख्न र मनबाटै जीवनको सही मार्ग चुन्न योगले मदत पुयाउँछ ।
योगको मूल मन्त्र नै छ, ' योग : चित्त वृत्ति निरोध' । योगले चित्त वा मनका वृत्तिहरूलाई निषेध गर्छ, खराब विचारको बीजारोपण हुन दिँदैन र मनलाई शान्त अवस्थामा राख्छ । योगले शान्ति बाहिरबाट ल्याएर मनलाई प्रदान गर्ने होइन मानिसले योगका अष्टाङ्गको अभ्यास गर्ने हो भने उभित्रके शान्ति आफैँ जागृत अवस्थामा आइपुग्छ । योगले मानसिक र शारीरिक स्फूर्ति र व्यायाम प्रदान गर्छ । मानव मन अनेक विकार वा मलहरूको भण्डार पनि हो। ती विकार वा मललाई बाहिर फालेर मनलाई निर्मल बनाउने काम योग साधनले गर्ने हुनाले योग अन्तर शान्ति प्रदान गर्ने प्रमुख माधयम हो । योग दर्शनमा उल्लेख भएका अभ्यासहरू यम, नियम, आसन, प्राणायाम, प्रत्याहर, धारणा ध्यानले नै मानिस समाधितर्फ उन्मुख हुन्छ। यिनै योगका अष्टाअङ्ग पनि हुन् । योग नै शान्ति प्राप्त गर्ने साधन पनि हो ।
