सरसफाइ अभियान सम्पन्न
२०७९/०९/२६
मकवानपुर जिल्लाको हेटौडा उप-महानगरपालिका वडा नं. १० भूटनदेवी स्थित प्रगति टोलमा एक हप्ते सरसफाइ अभियान सम्पन्न भयो । टोल सरसफाइ अभियानको अन्तिम दिन टोलबासीहरू बिहानैदेखि आ-आफ्ना सडक, चौर, घर वरपरका स्थान सफा गर्न हातमा पञ्जा लगाएर, कुचो तथा अन्य सरसामान बोकेर उपस्थित थिए। सरसफाइ सुरु भएको सातौँ दिन भएकाले उपस्थित सदस्यले आफूले बोकेको फोहोर हाल्ने डालोमा थोरैथोरे फोहोर जम्मा गरेका थिए । बिहान सात बजेदेखि उपस्थित सदस्यहरू ९ बजेसम्म सरसफाइमा संलग्न भएका थिए ।
नौ बजेपश्चात् टोलबासीहरू स्थानीय हुप्राचौरको चौरीमा भेला भए। उनीहरूले जम्मा पारेको फोहोरलाई फोहोरको प्रकृतिअनुसार छुट्टाछुट्टै थुप्रो लगाए । जसमा चाँडै सडेर जाने र खेतबारीमा मलको रूपमा प्रयोग गर्न सकिने, कुहिन धेरै समय लग्ने र नकुहिने किसिमका थुप्राहरू थिए । ती थुप्राहरूलाई टोलबासीले नगरपालिकाको फोहोर व्यवस्थापन समितिबाट आएका गाडीमा हालिदिए । उनीहरूले निकै मन लगाएर यो काम गरेको देखिन्थ्यो ।
फोहोर व्यवस्थापन पछि टोलबासीहरूले नजिकैको धारामा साबुनपानीले हातखुट्टा सफा गरेर चउरको एक कुनामा भेला भए । उक्त भेलामा टोल विकास समितिका अध्यक्ष कृष्ण बाबु दौलियाले टोलबासीले सञ्चालन गरेको एकहप्ते सरसफाइ अभियान सफलतापूर्वक सम्पन्न भएकामा सबैमा कृतज्ञता ज्ञापन गरे । उनले आगमी दिनमा टोललाई सधैँ सफा, सुन्दर र हराभर राख्न आवश्यक कोष खडा गरिने र खुल्ला ठाउँमा वृक्षरोपन गरिने बताए । उनको धारणाप्रति उपस्थित टोलबासीले सहमतिको ताली बजाए । अध्यक्ष कृष्ण बाबु दौलियाले नै एकहप्ते कार्यक्रम समापन भएको घोषणा गरे । करिब १० बजेतिर सबै जना आआफ्ना घरतर्फ लागे ।
सुझावहरू
• टोल सरसफाइ गरे पनि ठाउँठाउँमा फोहोर फाल्ने डस्टविन नराखेको हुनाले राख्नु पर्ने,
• टोल सरसफाइमा पुरुषहरूको उपस्थिति न्यून देखिएकाले आगामी दिनमा यसप्रति ध्यान पुयाउनु पर्ने।
प्रतिवेदक
धिरेन्द्र पुन मगर